L’amulain da hockey ha Fabian Ritzmann emprendì tar il Cdh Engiadina. Gia baud ha el dentant midà a Tavau, ed ha absolvì tar il HCD tut las partiziuns da juniors. Cun il Club da hockey da Tavau ha Fabian Ritzmann era fatg il pass en la liga naziunala A. Suenter duas stagiuns tar l’emprima equipa dal HCD ha el alura midà tar il SC Berna. La stagiun ch’è gest ida a fin per il SC Berna è gia stada sia terza en il dress da l’equipa da la chapitala. Ed igl è era la stagiun nua ch’igl giuven attatgader ha gì ses pli grond success. El è numnadamain vegnì clamà dal trenader Patrick Fischer en la squadra naziunala.
Gia fatg part a las squadras naziunalas dals juniors
Fabian Ritzmann enconuscha la taimpra dad ina squadra naziunala. Gia fitg baud ha el pudì ramassar sias emprimas experientschas en la squadra naziunala. El ha fatg part da l’equipa da juniors U16, alura dals U17, U18, U19 e per finir anc da l’equipa naziunala sut 20 onns. Cun quella ha el perfin pudì ir al campiunadi mundial sut 20 onns en il Canada.
L'atun lura era Fabian Ritzmann per l’emprima giada part da l’equipa naziunala. Ed uss è el vegni nominà per l’emprima giada en il cader da la squadra naziunala che sa prepara sin il proxim campiunadi mundial.
Mussar mintga di ch'ins tutga en la squadra naziunala
Anc mida la fatscha da la squadra naziunala da hockey cuntinuadamain. Patrick Fischer integrescha adina puspè novs giugaders da quellas equipas ch’en dadas or dals playoffs da la liga naziunala A. Actualmain dattan be pli Losanna ed ils ZSC Lions il final. A la fin da la stagiun vegn Patrick Fischer er ad integrar anc giugaders da quellas duas equipas en la squadra naziunala – e per finir lura era anc quels che crodan cun lur equipas or da la decisiun per il Stanley Cup en la NHL.
Il pli tard lura è la squadra che va al campiunadi mundial da hockey enconuschenta. Fabian Ritzmann spera sa chapescha ch’el fa a la fin part dal cader da la squadra che va en la Svezia ed en il Danemarc.
