La nova presidenta dal cussegl d'administraziun da la Repower SA ha num Barbara Janom Steiner. Ella suonda a dr. Monika Krüsi ch'è stada ils ultims set onns al timun da Repower. Las acziunarias ed ils acziunaris han approvà da distribuir ina dividenda da 5 francs ed ina dividenda speziala da 1,50 francs per aczia al num.
Naginas decisiuns dispitaivlas
Ils trais acziunaris gronds da la Repower – il chantun Grischun, las ovras electricas dal chantun da Turitg EKZ ed in fondo da la banca UBS – possedan 89 pertschient da las aczias da la Repower. Damai che quellas trais instanzas coordineschan lur agir èsi quasi nunpussaivel ch'i dat surpraisas tar las radunanzas dals acziunaris. Uschia han ils responsabels pudì preschentar a las acziunarias ed als acziunaris in dals megliers resultats en l'istorgia da l'interpresa: Per l'onn da gestiun 2024 ha Repower cuntanschì in resultat operativ da 175 milliuns francs ed in gudogn da la gruppa da 138 milliuns francs.
Elecziuns senza tensiun
La presidenta dal cussegl d'administraziun dr. Monika Krüsi n'è betg pli stada a disposiziun per ina reelecziun. Sco presidenta independenta ha ella manà dapi il 2018 il cussegl d'administraziun da la Repower SA. Grazia a sia gestiun ha la Repower fatg resultats remartgabels ed è sa sviluppada fermamain. A Mustér han il cussegl d'administraziun e la radunanza generala prendì cumià cun grond applaus da dr. Monika Krüsi ed han engrazià cordialmain ad ella per ses engaschament extraordinari a favur da la Repower SA.
La successiun da dr. Monika Krüsi sco presidenta dal cussegl d'administraziun da la Repower SA surpiglia Barbara Janom Steiner. Dal 2008 fin il 2018 è Barbara Janom Steiner stada cussegliera guvernativa dal Grischun. Actualmain presidiescha ella il cussegl da banca da la Banca naziunala svizra. Dapi il 2023 fa ella part dal cussegl d'administraziun da la Repower SA.
A la 121avla radunanza generala a Mustér èn stadas represchentadas 6’840’223 da las totalmain 7'390'968 vuschs d'aczias.